Afrika oo wajahaysa khasaare dhaqaale oo gaaraya $10–20 bilyan sababo la xiriira El Niño xooggan

Published July 26, 2026 - Updated July 26, 2026

2 MIN READ

Bangiga Horumarinta Afrika (AfDB) ayaa ka digay in ifafaalaha cimilo ee loo yaqaan “Super El Niño” uu sababi karo khasaare dhaqaale oo u dhexeeya $10 bilyan illaa $20 bilyan dalalka Afrika ee sida weyn u saameyn doona, iyadoo sidoo kale la filayo inuu horseedo barakac ballaaran iyo dhibaatooyin bani’aadamnimo.

Agaasimaha Isbeddelka Cimilada iyo Kobaca Cagaaran ee AfDB, Anthony Nyong, ayaa sheegay in dalalka ugu daran ay waxyeelladu ku dhici doonto ay celcelis ahaan lumin karaan 1% ilaa 2% wax-soo-saarkooda guud (GDP).

Wuxuu xusay in abaarta, fatahaadaha iyo duufaannada la xiriira El Niño ay sii wiiqi doonaan sugnaanta cuntada iyo biyaha, isla markaana dhaawici doonaan kaabeyaasha dhaqaalaha.

Nyong ayaa sidoo kale ka digay in dalal ay ka mid yihiin Soomaaliya, Suudaan, Koonfurta Suudaan, Jamhuuriyadda Dimuqraadiga ah ee Congo, Mali, Burundi iyo Nigeria ay wajihi karaan saameyn aad u daran, taasoo keeni karta barakac ballaaran iyo tartan ku saabsan biyaha iyo dhulka daaqsinka.

AfDB waxay sheegtay in beeraleyda Afrika ay sanadkan hore u wajahayaan khasaare lagu qiyaasay $330 milyan, halka waaxda kalluumeysigana ay saameyn ku yeelan doonaan kuleylka badda iyo duufaannada.

Bangigu wuxuu intaa ku daray in baahida maalgelinta la-qabsiga isbeddelka cimilada ee Afrika ay hadda gaari karto $100 bilyan sanadkan, si loo yareeyo saameynta El Niño ee la filayo.

Afrika oo wajahaysa khasaare dhaqaale oo gaaraya $10–20 bilyan sababo la xiriira El Niño xooggan

Get Goobjoog updates

From the comments