Kulanka Guddiga Joogtada ah ee Golaha Shacabka Baarlamaanka Jamhuuriyadda Federaalka Soomaaliya ayaa maanta ka qabsoomay Xarunta Guddoonka iyo Guddiyada ee Villa Hargeysa, waxaana shir-guddoominaysay Guddoomiyaha KMG ah ee Golaha Shacabka ahna Guddoomiye Ku-xigeenka Koowaad Marwo Sacdiya Yaasiin Xaaji Samatar.
Ajendaha kulanka ayaa ahaa diyaarinta iyo furitaanka Kalfadhiga 8-aad ee Golaha Shacabka, waxaana xubnaha Guddiga Joogtada ah ay si qoto dheer uga doodeen waqtiga ku habboon ee la furayo kalfadhiga 8-aad ee Golaha, si loo dardargeliyo loona sii ambaqaado waajibaadka dastuuriga ah iyo howlaha sharci dejinta ee horyaala Golaha.
Intii uu socday kulanka, xubnaha guddigu waxay isla garteen muhiimadda ay leedahay in Golaha Shacabku dib u guda galo howlaha horyaalla, gaar ahaan dhammeystirka sharciyada mudnaanta u leh dowlad-dhiska, xoojinta hay’adaha dowladda iyo horumarinta nidaamka dimuqraadiyadeed ee dalka.
From the comments