Maxkamad gaar ah oo ku taalla magaalada Mumbai ee dalka Hindiya ayaa xukun xabsi daa’in ah ku ridday 44 muwaadiniin Soomaali ah, kuwaas oo lagu helay dambiyo la xiriira burcad-badeednimo iyo afduub laba markab oo ka dhacay Badweynta Hindiya sannadkii 2024.
Sida ay wararku sheegayaan, 35 ka mid ah eedeysanayaasha ayaa lagu helay afduubka markabka ganacsiga ee MV Ruen, halka sagaal kale lagu xukumay afduubka doonta kalluumeysiga ee Al-Kambar 786 oo laga leeyahay dalka Iiraan.
Sida lagu sheegay warbixinta xeer-ilaalinta dhammaan eedeysanayaashu waxay maxkamadda ka hor qirteen dambiyada loo haystay, iyagoo sheegay in go’aankooda uu ahaa mid ay si iskood ah u qaateen, taas oo meesha ka saartay baahida loo qabi lahaa maxkamadeyn dheer.
Qoraal ay u gudbiyeen maxkamadda ayay ku sheegeen inay muddo ku dhow laba sano ku jireen xabsi, iyagoo la kulmay caqabado dhinaca luqadda, dhaqanka iyo cunnada ah, isla markaana aanay haysan cid gudaha Hindiya ka taageerta.
Waxay sidoo kale codsadeen in loo tixgeliyo inay yihiin dambiilayaal markii ugu horreysay fal noocan ah galay, isla markaana ay yihiin dad sabool ah oo ka yimid dal xiriir diblomaasiyadeed la leh Hindiya.
Si kastaba ha ahaatee, maxkamaddu waxay ku xukuntay dhammaantood xabsi daa’in, iyadoo lagu helay dambiyo hoos imanaya sharciyada la dagaallanka burcad-badeednimada, hubka, walxaha qarxa, baasaboorrada iyo ajaanibta ee dalka Hindiya.
Kiiskan ayaa la xiriira howlgalladii ciidamada badda ee Hindiya ay sanadkii 2024 ku soo qabteen kooxo burcad-badeed Soomaali ah, xilli ay sare u kacayeen weerarrada lagu qaado maraakiibta mara Badweynta Hindiya.
From the comments