Maqaallada Goobjoog
BAYDHABO, Goobjoog – Magaalada Baydhabo ee xarunta ku-meel-gaarka ah ee maamulka Koonfur Galbeed, waxaa si rasmi ah uga billowday jeedinta khudbadaha ay musharaxiinta xilka madaxweynaha u marsiinayaan xildhibaannada baarlamaanka. Tartankan…
BAYDHABO, Goobjoog – Magaalada Baydhabo ee xarunta ku-meel-gaarka ah ee maamulka Koonfur Galbeed, waxaa si rasmi ah uga billowday jeedinta khudbadaha ay musharaxiinta xilka madaxweynaha u marsiinayaan xildhibaannada baarlamaanka.
Tartankan oo si weyn loo wada sugayay, ayaa musharax kastaa wuxuu soo bandhigay hiigsigiisa siyaasadeed, amniga, iyo horumarinta deegaanka.
Musharax Aadan Madoobe: Xoreynta Amniga iyo Horumarinta Adeegyada Bulshada
Musharax Aadan Madoobe ayaa soo bandhigay qorshe dhammaystiran oo taabanaya dhammaan baahiyaha aasaasiga ah ee Koonfur Galbeed, isagoo ballan-qaaday dhowr qodob oo muhiim ah:
Mideynta iyo Dib u Heshiisiinta
Wuxuu caddeeyay inuu si dhab ah uga shaqeyn doono isu-keenista bulshada iyo dib u heshiisiin waarta oo dhex marta beelaha wada dega maamulka.
Xoreynta iyo Amniga
Aadan Madoobe ayaa ballan-qaaday inuu mudnaanta koobaad siin doono sidii kooxda Al-Shabaab looga xoreyn lahaa dhammaan deegaannada ay kaga sugan yihiin maamulka Koonfur Galbeed.
Caddaaladda iyo Dhaqaalaha
Wuxuu hoosta ka xariiqay inuu hirgelin doono maamul-wanaag iyo caddaalad, isagoo qorsheeyay kobcinta dhaqaalaha, yareynta saboolnimada, iyo abuurista fursado shaqo oo loo fidinayo dhallinyarada.
Wax-soo-saarka iyo Beeraha
Wuxuu ballan-qaaday in la xoojin doono tabaca beeraha iyo wax-soo-saarka gobolka si loo gaaro is-ku-filnaansho cunto.
Adeegyada Bulshada
Wuxuu ballan-qaaday horumarin ballaaran oo lagu sameyn doono Caafimaadka, Waxbarashada, helitaanka Biyo nadiif ah, iyo dhammaan adeegyada kale ee muhiimka u ah bulshada.
Musharax Shariif Xasan Sheekh Aadan
Baaq Ku Aaddan Isbeddel iyo Nabadeyn
Madaxweynihii hore ee Koonfur Galbeed, Shariif Xasan Sheekh Aadan, ayaa isna dhankiisa jeediyay khudbad kooban, inkastoo falanqeeyayaashu ay xuseen inaysan ka muuqan diyaargarow badan oo qoto-dheer. Qodobadii uu diiradda saaray waxaa ka mid ahaa:
Dowlad-Wanaag iyo Sinaan
Wuxuu ballan-qaaday inuu dib u soo celin doono hannaanka dowladnimo ee ku dhex-baxsan sinaanta iyo maamul-wanaagga.
Dib u Heshiisiin
Wuxuu sheegay in waayo-aragnimadiisa uu u isticmaali doono nabadaynta iyo dib u heshiisiinta deegaannada.
Codsiga Codka: Gabagabadii, wuxuu xildhibaannada baarlamaanka ka codsaday inay kalsoonidooda iyo codkooda siiyaan si uu isbeddelkaas u hoggaamiyo.
Musharax Cabdicasiis Maxamed
Dhisidda Nidaam Dowladeed oo Sal Adag
Musharax Cabdicasiis Maxamed Cismaan ayaa isna dhankiisa la yimid aragti ku qotonta dhismaha hay’adaha dowladda iyo mashaariicda horumarineed
Nidaam Dowladeed oo Sugan
Wuxuu ballan-qaaday dhisidda nidaam (system) dowladeed oo sal adag, la isku halayn karo (aamin ah), isla markaana si toos ah u wejihi kara baahiyaha dhabta ah ee bulshada.
Ammaanka iyo Xasiloonida
Wuxuu sheegay inuu diiradda saari doono abuurista xasilooni waarta ee dhanka amniga ah.
Mashaariic Horumarineed: Cabdicasiis ayaa ballan-qaaday fulinta mashaariic horumarineed oo wax ku ool ah, kuwaas oo isbeddel muuqda ka samayn doona kaabayaasha dhaqaalaha iyo nolosha shacabka Koonfur Galbeed.
From the comments