Guddoomiyaha Golaha Shacabka oo la kulmay madaxda warbaahinta gaarka loo leeyahay

Published October 27, 2026 - Updated October 27, 2026

Akhris 2 daqiiqo ah

Muqdisho – 27 Oktoobar 2026: Guddoomiyaha Golaha Shacabka ee Baarlamaanka Federaalka Soomaaliya, Cabdulqaadir Maxamed Nuur (Jaamac), ayaa kulan la qaatay madaxda warbaahinta gaarka loo leeyahay, kaas oo looga hadlay xoojinta wada-shaqeynta Golaha Shacabka iyo warbaahinta, ilaalinta xorriyadda saxaafadda iyo ka hortagga faafinta wararka been-abuurka ah.

Kulanka ayaa diiradda lagu saaray sidii loo xoojin lahaa xiriirka ka dhexeeya Golaha Shacabka iyo warbaahinta, kor loogu qaadi lahaa hufnaanta xogta la gudbinayo, loona xaqiijin lahaa in bulshada Soomaaliyeed ay hesho xog sugan oo ku saabsan howlaha baarlamaanka iyo arrimaha qaranka.

Guddoomiye Cabdulqaadir Maxamed Nuur ayaa sheegay in warbaahinta xorta ah, gaar ahaan tan sameysa dabagal iyo dhaliil wax-ku-ool ah, ay door muhiim ah ka qaadato horumarka dalka, daahfurnaanta hay’adaha dowladda iyo isla xisaabtanka.

Waxa uu sidoo kale madaxda warbaahinta ugu baaqay inay ka qeyb qaataan ka hortagga wararka been-abuurka ah iyo dacaayadaha, gaar ahaan kuwa uu sheegay inay u adeegaan Khawaarijta iyo cid kasta oo qorshe ka dhan ah amniga iyo dowladnimada Soomaaliya waddo.

Kulankan ayaa imaanaya iyadoo la adkeynayo muhiimadda ay leedahay wada-shaqeynta hay’adaha dowladda iyo warbaahinta, iyadoo la ilaalinayo madaxbannaanida saxaafadda iyo xaqa ay bulshada u leedahay helitaanka xog sax ah.

Guddoomiyaha Golaha Shacabka oo la kulmay madaxda warbaahinta gaarka loo leeyahay

Ka hel Goobjoog wixii cusub.

From the comments