Wasiirka Qorsheynta, Maalgashiga iyo Horumarinta Dhaqaalaha ee Dowladda Federaalka Soomaaliya, Maxamuud Cabdiraxmaan Faarax (Beenebeene), ayaa khudbad rasmi ah oo uu ka jeediyay shirka Heer Wasiir ee Golaha Dhaqaalaha iyo Arrimaha Bulshada ee Qaramada Midoobay (ECOSOC) ku soo bandhigay guulaha waawayn ee ay Soomaaliya ka gaartay dhinacyada dhaqaalaha, amniga, iyo dhismaha dowladnimada.
Wasiirka ayaa beesha caalamka horteeda ku iftiimiyay isbeddellada taariikhiga ah ee dalka ka dhacay muddooyinkii u dambeeyay, isagoo xusay guusha weyn ee laga gaaray dhammaystirka Barnaamijka Deyn Cafinta ee (HIPC), qaadista cunaqabateyntii hubka ee Qaramada Midoobay, iyo guulaha laga gaaray dib-u-xoreynta deegaannada dalka looga saaray Khawaarijta.
Sidoo kale, wuxuu tilmaamay diyaargarowga doorashooyinka qof iyo cod ah oo dalka ka dhaca markii ugu horreysay muddo ka badan nus qarni iyo guusha diblamaasiyadeed ee Soomaaliya ay ku guuleysatay kursiga ku-meel-gaarka ah ee Golaha Ammaanka ee Qaramada Midoobay.
From the comments