DFS oo Daah-furtay Barnaamijka Xoojinta Amniga Xuduudaha iyo Garoomada Diyaaradaha

Published July 23, 2026 - Updated July 23, 2026

2 MIN READ

Wasiirka Wasaaradda Amniga Gudaha ee Dowladda Federaalka Soomaaliya, Janaraal Cabdullaahi Sheekh Ismaaciil (Fartaag), ayaa maanta si rasmi ah u daah-furay Barnaamijka Iskaashiga Dhismaha iyo Xoojinta Amniga Xuduudaha Garoomada Diyaaradaha ee Soomaaliya.

Barnaamijkan ayaa loogu talagalay in lagu xoojiyo awoodda hay’adaha ka shaqeeya sugidda amniga xuduudaha, iyadoo diiradda la saarayo horumarinta tayada shaqaalaha, casriyeynta hababka maamulka xuduudaha, adkaynta amniga garoomada diyaaradaha iyo kobcinta iskaashiga dowladda Soomaaliya ay la leedahay saaxiibbada caalamiga ah.

Wasiir Cabdullaahi Sheekh Ismaaciil (Fartaag) ayaa sheegay in sugidda amniga xuduudaha iyo garoomada diyaaradaha ay tahay tiir muhiim u ah amniga qaranka iyo la dagaallanka khataraha ka gudba xuduudaha.

Wuxuu xusay in Dowladda Federaalka Soomaaliya ay mudnaan gaar ah siinayso dhismaha hay’ado amni oo leh aqoon, xirfad iyo awood ay kula tacaalaan caqabadaha amni ee dalka ka jira.

Sidoo kale, Wasiirka ayaa tilmaamay in barnaamijkani uu door weyn ka qaadan doono tayeynta shaqaalaha amniga, xoojinta maamulka xuduudaha, fududeynta isu-socodka sharciga ah iyo sare u qaadidda wada-shaqeynta hay’adaha amniga, iyadoo la waafajinayo heerarka iyo habraacyada caalamiga ah.

Mas’uuliyiin ka socotay hay’adaha amniga iyo wakiillo ka socday saaxiibbada caalamiga ah ayaa ka qeyb galay munaasabadda daah-furka, iyagoo muujiyey taageeradooda ku aaddan dadaallada lagu horumarinayo amniga xuduudaha iyo garoomada diyaaradaha ee Soomaaliya.

DFS oo Daah-furtay Barnaamijka Xoojinta Amniga Xuduudaha iyo Garoomada Diyaaradaha

Get Goobjoog updates

From the comments