Ra’iisul Wasaaraha Xukuumadda Federaalka Soomaaliya, Xamsa Cabdi Barre, ayaa dhowaan shaaciyay qorshe ka kooban dib-u-habayn ballaaran oo lagu samaynayo waxbarashada Islaamiga ah, dhiirrigelinta hay’adaha diinta, iyo casriyeinta maamulka danta guud.
Isaga oo hadal kajeedinayay munaasabadda qalin-jabinta dufcaddii ugu horreysay ee heerka Master-ka ee kuliyadda Dacwadda iyo Garsoorka ee Jaamacadda Qaranka Soomaaliyeed, Ra’iisul Wasaaruhu wuxuu tilmaamay in markii ugu horreysay taariikhda Soomaaliya hab cusub oo qaran loo sameeyay waxbarashada Islaamiga ah, iyadoo dugsiyada qur’aanka (duqsiyada) si buuxda loogu dhex-galinayo nidaamka waxbarashada rasmiga ah ee dalka.
Sida uu sheegay Ra’iisul Wasaare Xamsa, mas’uuliyadda dugsiyada qur’aanka ayaa si rasmi ah looga wareejiyay Wasaaradda Awqaafta iyo Diinta, waxaana loo wareejiyay Wasaaradda Waxbarashada. Tallaabadan ayaa u go’aaminaysa dugsiyada qur’aanka inay noqdaan hay’ado waxbarasho oo rasmi ah, kuwaas oo lahaan doona manhaj waafaqsan heerarka qaranka, aqoonsi rasmi ah, iyo kormeer dowladeed.
Waxaa kale oo qorshaha qayb ka ah in macallimiinta dugsiyada qur’aanka ay helaan tababarro rasmi ah iyo shahaadooyin la aqoonsan yahay si loo baahiyo heerka tayada maamul iyo mid waxfundis.
Majliska Sare ee Culumada iyo Nidaamka Dijitaalka Ah
Dowladda waxay sidoo kale ka shaqaynaysaa dhisidda Majliska Sare ee Culumada Soomaaliyeed, oo mas’uul ka noqon doona soo saarida fataawada diiniga ah oo mideysan. Tani waxay beddeli doontaa tafsiirradii kala duwanaa ee horey uga soo bixi jiray sheekh kasta.
Sharciga majliskan lagu dhisayo ayaa horey loogu ansixiyay Golaha Wasiirrada, wuxuuna hadda ka dhowrayaa ansixinta Baarlamaanka. Dowladda ayaa sidoo kale xarun rasmi ah oo maamul iyo maktabado leh u dhisaysa culumada.
Sidoo kale, Ra’iisul Wasaaruhu wuxuu shaaciyay in la samaynayo nidaam dijitaal ah oo lagu diiwaangelinayo dugsiyada qur’aanka, maahadada Islaamiga ah, iyo jaamacadaha, si loo xaqiijiyo xaqiiqada shahaadooyinka iyo diiwaannada aqooneed ee ardayda, taas oo kor u qaadi doonta hufnaanta nidaamka waxbarashada.
Dhisidda Aqoon-yahanno Daboola Baahiyaha Cusub ee Dalka
Ugu dambeyntii, Ra’iisul Wasaaraha ayaa ugu baaqay jaamacadaha dalka inay soo saaraan aqoon-yahanno awood u leh inay ka jawaabaan baahiyaha maamul ee dalka ka jira, sida garsoorayaal ku takhasusay sharciga baddaha, khilaafaadka batroolka, dambiyada maaliyadda, hantidhawrka, iyo fiqhiga Islaamka.
Ra’iisul Wasaare Xamsa Cabdi Barre ayaa ku soo gaba gabeeyay in dib-u-habayntan ay qayb ka tahay dadaallada ballaaran ee dhismaha dowladda iyo xaqiijinta xasiloonida muddada dheer.
From the comments