Wasaaradda Arrimaha Dibedda Soomaaliya oo Waraaqaha Aqoonsiga ka guddoontay Safiirka cusub ee Turkiga

Ku-xigeenka Wasiirka Arrimaha Dibadda iyo Iskaashiga Caalamiga ah ee Soomaaliya, Xasan Maxamed Cali (Nadaara), ayaa Muqdisho ku qaabilay waraaqaha aqoonsiga ee Ferhat Alkan, Safiirka cusub ee Turkiga u qaabilsan Jamhuuriyadda Federaalka Soomaaliya.

Kulanka ayaa looga hadlay xoojinta xiriirka iyo iskaashiga u dhexeeya Soomaaliya iyo Turkiga, iyadoo labada dhinac ay ku tilmaameen labada dal kuwo xiriir dhow oo ku dhisan diin, taariikh iyo iskaashi soo jireen ah.

Ku-xigeenka Wasiirka ayaa soo dhaweeyay Safiirka cusub, isagoo muujiyay muhiimadda ay leedahay in la sii xoojiyo xiriirka labada dal iyo iskaashiga dhinacyada kala duwan.