Dowladda Itoobiya ayaa qorshaynaysa inay Soomaaliya kala baxdo in ka badan 3,000 askari, iyadoo warbixin ay baahisay Bloomberg sheegtay in Addis Ababa ay doonayso inay dib ugu celiso ciidamadeeda dalka, si ay uga qeyb qaataan dagaallada sii xoogeysanaya ee ka dhanka ah kooxaha fallaagada ah ee gudaha Itoobiya.
Sida ay Bloomberg ku warrantay, ilo xog-ogaal ah ayaa sheegay in ciidamadan ay bilaabi karaan ka bixitaanka Soomaaliya maalmaha ama toddobaadyada soo socda. Ilo-wareedyada ayaa codsaday inaan magacyadooda la shaacin, maadaama aysan awood u lahayn inay warbaahinta kala hadlaan arrintan.
Qorshahan ayaa kusoo beegmaya xilli dowladda Itoobiya ay wajahday dagaallo sii xoogeysanaya oo gudaha dalka ah, gaar ahaan iyadoo ciidamada dowladda ay la tacaalayaan kooxo hubeysan oo fallaago ah. Sida lagu sheegay warbixinta, xaaladda gudaha Itoobiya ayaa keentay in dowladda Addis Ababa ay dib u eegto halka ay u adeegsanayso ciidamadeeda iyo kheyraadkeeda milatari.
Si kastaba ha ahaatee, weli si cad looma xaqiijin tirada ciidamada Itoobiya ee Soomaaliya ka bixi doona iyo in dhammaan ciidamadan ay ka tirsan yihiin Howlgalka Midowga Afrika ee AUSSOM, ama ay ku jiraan ciidamo Itoobiyaan ah oo Soomaaliya ku jooga heshiisyo amni oo laba geesood ah.
Dhanka Soomaaliya, warbixintu waxay tilmaamaysaa in dowladda federaalka aysan weli helin ogeysiis rasmi ah oo ku saabsan qorshaha Itoobiya ee ciidamadeeda looga saarayo dalka, dowladda Itoobiya sidoo kale weli si rasmi ah ugama aysan hadlin warbixinta Bloomberg.
Itoobiya ayaa muddo dheer ka mid ahayd dalalka ciidamo ku leh Soomaaliya, kuwaas oo qeyb ka ahaa dadaallada amniga iyo dagaalka lagula jiro Al-Shabaab.
Haddii qorshaha cusub la hirgeliyo, bixitaanka kumannaan askari ayaa saameyn ku yeelan kara qaabka ay ciidamada Soomaaliya iyo kuwa caalamiga ah u maareeyaan ammaanka deegaanada ay ciidamada Itoobiya ka howlgalaan.
Warbixinta ayaa sidoo kale xustay in Itoobiya ay horey u soo wajahday xaalad la mid ah sanadkii 2020, xilligaas oo dagaalkii Tigray uu billowday, iyadoo ciidamo Itoobiyaan ah oo ku sugnaa Soomaaliya dib loogu celiyay Itoobiya si looga qeybgeliyo dagaalka gudaha dalka.
From the comments