Golaha Shacabka oo Akhrinta Labaad Marsiiyey Hindise Sharciyeedka Iskaashiga Garsoorka Caalamiga ah

Published September 5, 2026 - Updated September 5, 2026

Akhris 2 daqiiqo ah

Xildhibaannada Golaha Shacabka ee Baarlamaanka Federaalka Soomaaliya ayaa maanta yeeshay kulankooda 11-aad ee Kalfadhiga 8-aad, kaas oo uu shir guddoomiyey Guddoomiye Ku-xigeenka Labaad ee Golaha Shacabka, Cabdullaahi Cumar Abshirow.

Kulanka ayaa markii hore lagu soo jeediyey in ajendaha lagu daro dood ku saabsan xaaladda guud ee amniga dalka, hase yeeshee kadib cod loo qaaday soo jeedintaas, Xildhibaannadu waxay diideen in ajendaha kulanka lagu daro.

Intaas kadib, Golaha Shacabka ayaa Akhrinta Labaad marsiiyey Hindise Sharciyeedka Iskaashiga Garsoorka Caalamiga ah, kaas oo horey Akhrinta Koowaad loo marsiiyey. Guddiga Garsoorka, Awqaafta iyo Arrimaha Diinta ee Golaha Shacabka ayaa Xildhibaannada u soo bandhigay warbixinta ku saabsan Akhrinta Labaad ee hindise sharciyeedka.

Dood iyo aragtiyo ay Xildhibaannadu ka dhiibteen hindisaha kadib, Guddoomiye Ku-xigeenka Labaad ayaa guddiga faray in uu hindise sharciyeedka ku daro aragtiyada, doodaha iyo talooyinka Xildhibaannada, ka hor inta aan Golaha dib loogu soo celin Akhrinta Saddexaad.

Hindise Sharciyeedka Iskaashiga Garsoorka Caalamiga ah ayaa muhiim u ah dejinta hannaan sharci oo lagu xoojinayo iskaashiga Soomaaliya iyo dhinacyada garsoorka ee caalamka, gaar ahaan arrimaha u baahan wada-shaqeyn sharci iyo garsoor oo ka dhexeysa dalalka.

Dhanka kale, Xildhibaannada Golaha Shacabka ayaa loo qeybiyey warbixinta Akhrinta Saddexaad ee Hindise Sharciyeedka Hay’adda Dakhliga Qaranka, taas oo qeyb ka ah howlaha sharci-dejinta ee Golaha.

Golaha Shacabka oo Akhrinta Labaad Marsiiyey Hindise Sharciyeedka Iskaashiga Garsoorka Caalamiga ah

Ka Hel Goobjoog Wixii Cusub

From the comments