Ganacsatada Suuqa Bakaaraha oo shaqo joojin ku dhawaaqay

Waxaa maanta gabi ahaanba xiran oo aan shaqaynayn qeybo muhiim ah oo ka mid ah Suuqa Bakaaraha ee magaalada Muqdisho, ka dib markii ganacsatadu ay go’aansadeen inay albaabada u laabaan goobahooda ganacsi.

Tallaabadan ayaa timid ka dib markii ganacsatadu ay sheegeen inay dhibsadeen canshuur xad-dhaaf ah oo ay dhowaan ku soo rogtay Wasaaradda Maaliyadda ee Xukuumadda Federaalka Soomaaliya, taas oo ay ku tilmaameen mid culeys weyn ku ah sii socoshada ganacsiyadooda.

Ganacsato kala duwan oo la hadlay warbaahinta ayaa sheegay in canshuurta cusub ee lagu soo rogay ay tahay mid ka baxsan awooddooda, ayna horseedi karto in qiimaha maciishadda uu kor u kaco, taas oo saameyn doonta dadka shacabka ah ee awalba la tacaalayay xaalado nololeed.