Ururka OPEC+ ayaa ku dhawaaqay inuu kordhinayo wax-soo-saarka saliidda laga bilaabo bisha Agoosto, iyadoo la arkayo calaamado muujinaya in suuqyada tamarta ay dib u xasilloonaanayaan kadib dagaalkii u dhexeeyay Maraykanka, Israa’iil iyo Iiraan.
Go’aankan ayaa waxaa si wadajir ah u qaatay toddobo dal oo kala ah Sacuudiga, Ruushka, Ciraaq, Kuweyt, Kazakhstan, Aljeeriya iyo Cumaan.
Dalalkan ayaa sheegay inay kordhin doonaan wax-soo-saarka saliidda 188,000 foosto maalintii laga bilaabo bisha Agoosto, kadib kulan muuqaal ah oo ay ku qiimeeyeen xaaladda suuqa caalamiga ah.
Tani waxay noqonaysaa bishii shanaad oo xiriir ah oo dalalkan ay kordhiyaan wax-soo-saarka, iyadoo si tartiib tartiib ah looga laabanayo dhimistii wax-soo-saarka ee la bilaabay sanadkii 2023.
OPEC+ ayaa sheegtay inay sii wadi doonto la socodka xaaladda suuqa, isla markaana ay diyaar u tahay inay kordhiso, hakiso ama dib u dhinto wax-soo-saarka haddii xaaladdu is beddesho.
Dhanka kale, qiimaha Shidaalka ayaa dib ugu soo laabtay heerarkii uu joogay ka hor dagaalka, iyadoo rajada laga qabo nabad waarta iyo dib u furitaanka isu-socodka maraakiibta ee marin-biyoodka muhiimka ah ee Hormuz ay sare u kacday.
Falanqeeyayaasha suuqyada ayaa sheegay in kororka wax-soo-saarka uu qayb ka yahay dadaallada lagu daboolayo baahida suuqa, hase yeeshee ay weli jiraan arrimo ay ka mid yihiin baahida hoose ee Shiinaha iyo kororka dhoofinta saliidda ee Maraykanka iyo Ruushka, kuwaas oo sababi kara in saliiddu suuqa ku badato bilaha soo socda.
From the comments