SOOMAALIYA IYO JARMALKA OO KA WADA HADLAY XOOJINTA ISKAASHIGA DHINACYADA DIFAACA IYO AMNIGA

Muqdisho – Kaaliyaha Taliska Guud ee Ciidanka Xoogga Dalka Soomaaliyeed, Sareeye Gaas Maxamed Cali Bariise, ayaa xafiiskiisa ku qaabilay U-Qaabilsaha Difaaca ee Dowladda Jarmalka, Gaashaanle Dhexe Michael Lüx.

Kulanka oo ay goobjoog ka ahaayeen qaar ka mid ah hoggaannada Taliska Guud ee Ciidanka Xoogga Dalka Soomaaliyeed ayaa diiradda lagu saaray xaaladda amni ee gobolka Geeska Afrika, qorshaha la wareegista mas’uuliyadda amniga dalka iyo xoojinta iskaashiga dhinacyada difaaca iyo amniga badda.

Labada dhinac ayaa sidoo kale ka wada hadlay sidii loo sii xoojin lahaa wada-shaqeynta Soomaaliya iyo Jarmalka, gaar ahaan taageerada horumarinta iyo tayeynta Ciidanka Xoogga Dalka Soomaaliyeed.