Dowladda Soomaaliya oo Bixinaysa Waxbarashada Tacliinta Sare ee Saddexda Arday ee Ku Guuleystay Tartanka Qur’aanka

Published September 15, 2026 - Updated September 15, 2026

Akhris 2 daqiiqo ah

Muqdisho, Sebteembar 15, 2026 — Ra’iisul Wasaaraha Xukuumadda Jamhuuriyadda Federaalka Soomaaliya, Mudane Xamsa Cabdi Barre, ayaa maanta xafiiskiisa ku qaabilay saddex arday oo Soomaaliyeed oo kaalmaha koowaad ilaa saddexaad ka galay tartan caalami ah oo Qur’aanka Kariimka ah oo lagu qabtay dalka Qatar.

Ardayda uu Ra’iisul Wasaaruhu qaabilay ayaa kala ah Qaari Cabdiqani Cabdiqaadir Sheekh Xuseen, oo ku guuleystay kaalinta koowaad, Qaari Cabdiraxmaan Qaasim Maxamed, oo galay kaalinta labaad, iyo Qaari Cabdiraxmaan Axmed Maxamuud, oo ku guuleystay kaalinta saddexaad.

Ra’iisul Wasaare Xamsa Cabdi Barre ayaa ardayda ugu hambalyeeyay guusha taariikhiga ah ee ay Soomaaliya uga soo hoyeen tartanka caalamiga ah, isagoo ku ammaanay dadaalkooda, kartidooda iyo sida ay magaca Soomaaliya uga dhex muuqdeen tartanka.

Ra’iisul Wasaaraha ayaa sidoo kale ballanqaaday in Dowladda Federaalka Soomaaliya ay bixin doonto waxbarashada tacliinta sare ee saddexda arday, si ay u sii wataan waxbarashadooda una horumariyaan aqoontooda iyo xirfaddooda.

Guusha ay ardaydan ka gaareen tartanka Qur’aanka Kariimka ah ayaa loo arkaa guul sharaf u ah Soomaaliya, gaar ahaan dhallinyarada Soomaaliyeed ee ku dadaalaya barashada, xifdinta iyo fahamka Qur’aanka Kariimka ah.

Dowladda Federaalka Soomaaliya ayaa marar badan adkaysay muhiimadda ay leedahay taageeridda dhallinyarada, waxbarashada iyo kobcinta aqoonta, iyadoo guulaha noocan ah ay dhiirrigelin u yihiin jiilka cusub ee Soomaaliyeed.

Dowladda Soomaaliya oo Bixinaysa Waxbarashada Tacliinta Sare ee Saddexda Arday ee Ku Guuleystay Tartanka Qur’aanka

Ka hel Goobjoog wixii cusub.

From the comments