Madaxweyne Xasan Sheekh oo ka hadlay dagaalka Al-Shabaab, amniga iyo doorashooyinka qof iyo cod

Published October 25, 2026 - Updated October 25, 2026

Akhris 2 daqiiqo ah

Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa khudbad uu u jeediyey shacabka Soomaaliyeed kaga hadlay xaaladda guud ee dalka, dagaalka ka dhanka ah Al-Shabaab, horumarka dhinaca amniga iyo qorshaha dowladda ee hirgelinta doorashooyinka qof iyo cod.

Madaxweynaha ayaa sheegay in dowladda ay mudnaan siinayso dadaallada lagu xaqiijinayo amniga dalka, laguna wiiqayo awoodda Al-Shabaab, isaga oo sidoo kale ka hadlay muhiimadda ay leedahay in la sii xoojiyo hay’adaha dowladda iyo dadaallada lagu dhisayo dowladnimo awood leh.

Xasan Sheekh ayaa sidoo kale diiradda saaray horumarinta hannaanka dimuqraadiyeynta dalka, isaga oo adkeeyay qorshaha dowladda ee ku aaddan in shacabka Soomaaliyeed ay si toos ah codkooda ugu doortaan hoggaamiyeyaashooda.

Madaxweynaha ayaa xusay in doorashooyinka qof iyo cod ay qayb ka yihiin dadaallada lagu horumarinayo nidaamka siyaasadeed ee Soomaaliya, lana doonayo in dalka laga gudbiyo hannaan doorasho oo dadban.

Dhanka kale, Madaxweynaha ayaa ka hadlay muhiimadda ay leedahay xoojinta wada-hadallada siyaasadeed, ilaalinta midnimada dalka iyo in la helo is-afgarad ku saabsan arrimaha masiiriga ah ee Soomaaliya.

Hadalladan ayaa ku soo beegmaya xilli dalka uu wajahayo doodo siyaasadeed oo la xiriira hannaanka doorashooyinka, iyadoo dowladda federaalku ku adkeysanayso qorshaheeda doorashada qof iyo cod, halka mucaaradka qaarkood ay walaac ka muujiyeen habka loo wajahayo geeddi-socodka doorashada.

Madaxweyne Xasan Sheekh oo ka hadlay dagaalka Al-Shabaab, amniga iyo doorashooyinka qof iyo cod

Ka hel Goobjoog wixii cusub.

From the comments