Golaha Shacabka oo dalbaday in la kordhiyo goobaha laga qaato Aqoonsiga NIRA

Published September 22, 2026 - Updated September 22, 2026

Akhris 2 daqiiqo ah

Muqdisho, Soomaaliya – 22 Sebtembar 2026: Guddiga Arrimaha Gudaha, Maamulada Gobollada iyo Amniga ee Golaha Shacabka Baarlamaanka Federaalka Soomaaliya ayaa maanta kulan la yeeshay Wasiirka Wasaaradda Arrimaha Gudaha, Federaalka iyo Dib-u-heshiisiinta, Cali Yuusuf Cali (Cali Xoosh) iyo Maareeyaha Hay’adda Aqoonsiga iyo Diiwaangelinta Qaranka (NIRA), Cabdiwali Cali Cabdulle.

Kulanka oo uu shir guddoominayay kusimaha Guddoomiyaha Guddiga, ahna Guddoomiye Ku-xigeenka Guddiga, Xildhibaan Nuur Axmed Diiriye (Nuur Afey), ayaa Wasiirka iyo Maareeyaha NIRA looga dhageystay warbixinno ku saabsan shaqada, waajibaadka iyo xaaladda guud ee Hay’adda NIRA.

Guddiga ayaa si gaar ah diiradda u saaray adeegyada aqoonsiga iyo diiwaangelinta muwaadiniinta, iyadoo xubnaha Guddigu ay su’aalo ka weydiiyeen howlaha Hay’adda, caqabadaha horyaalla, adeegyada ay bulshada siiso iyo qorshayaasha horumarinta.

Sidoo kale, kulanka ayaa looga hadlay iskaashiga u dhexeeya Wasaaradda Arrimaha Gudaha iyo Hay’adda NIRA, iyo sidii loo sii horumarin lahaa adeegyada aqoonsiga ee dalka.

Gebagebadii, Guddiga ayaa maamulka NIRA kula dardaarmay in la kordhiyo goobaha diiwaangelinta iyo adeegyada aqoonsiga, si muwaadiniintu si fudud ugu helaan adeegyada Hay’adda.

Guddigu wuxuu sidoo kale ku boorriyay Hay’adda in la kordhiyo saacadaha shaqada, si loo fududeeyo helitaanka adeegyada aqoonsiga iyo diiwaangelinta muwaadiniinta.

Golaha Shacabka oo dalbaday in la kordhiyo goobaha laga qaato Aqoonsiga NIRA

Ka Hel Goobjoog Wixii Cusub

From the comments