Doorashada ku celiska ah ee Galmudug oo maanta ka dhacaysa deegaannada maamulkaas

Doorashada qof iyo codka ee dowlad-goboleedka Galmudug ee ku celiska ah ayaa maanta ka dhacaysa deegaanno kala duwan oo ka tirsan maamulkaas, iyadoo shacabka ay safaf dheer dheer ugu  jiraan inay codkooda ka dhiibtaan goobaha loo diyaariyey doorashada.

Magaalada caasimadda ah ee Dhuusamareeb iyo magaalooyinka kale ee waaweyn, sida Guriceel, Cadaado iyo Gaalkacyo, ayaa kamid ah meelaha laga filayo inay ka dhacdo doorashadu, iyadoo sidoo kale la qorsheeyay in codbixintu gaarto deegaanno iyo tuulooyin kale oo ka tirsan Galmudug.

Guddiga doorashooyinka ayaa doorashada u asteeyay inay dhacdo maanta oo taariikhdu tahay 30-ka Sebtembar, waxaana saaka deegaanno badan laga dareemayay diyaar-garowga doorashada.