Ra’iisul Wasaaraha Xukuumadda Federaalka Soomaaliya mudane Cabdiweli Sheekh Axmed Maxamed ayaa maanta shir guddoomiyey kulankii caadiga ah ee Golaha Wasiirada, waxaana looga hadlay arrimo dhowr ah oo ku saabsan xaaladda dalka, iyadoo goluhu cod aqlabiyad ah ku ansixiyeen magacaabista Wasiirka amniga Qaranka iyo Taliyayaasha Ciidamadda Booliska iyo Nabad-sugidda oo dhawaan uu magacaabay Ra’iisul Wasaaruhu.
Kulanka markii uu soo dhammaaday kadib, waxaa Saxaafadda la hadlay Afhayeenka Xukuumadda Ridwaan Xaaji Cabdiweli, waxaana uu sheegay goluhu inuu meel mariyay sharciyo muhiim u ah dowladnimada Soomaaliya, isla markaana uu soo afmeeray doodii la xiriirtay Maamulka Baasaboorka Diblumaasiga cida xaqa u leh qaadashadiisa, iyadoo goluhu isku raacay in Wasaarada Arrimaha Dibaddu ay tahay mida go’aanka ka gaaraysa cida qaadanaysa Baasaboorka Diblumaasiga ah. waxaana afahayeenku xusay in arrintan looga golleeyahay sidii lagu soo celin lahaa sharafta iyo hanaanka loo marayo qaadashada Baasaboorka.
Ra’iisul Wasaare Cabdiweli oo kulanka golaha ka hadlay ayaa sheegay is badalka lagu sameeyay laamaha ammaanka dalka wax badan inuu ka badali doono falalka waxashnimo ee kooxaha Nabad-diidku geysanayaan.



From the comments