Jabhadda ONLF/JWXO ayaa munaasabado kala duwan ku qabatay magaalooyin ka tirsan dalal badan oo dunida ah, iyadoo lagu xusayay 42-guuradii ka soo wareegtay markii ururka la aasaasay 15-kii Agoosto 1984.
Munaasabadaha ayaa ka dhacay magaalooyin ay ka mid yihiin Nairobi ee Kenya iyo London, iyadoo sidoo kale xusaska lagu qabtay meelo kale oo ay ku nool yihiin taageerayaasha iyo bulshada Soomaaliyeed ee daneeya qadiyadda ONLF.
Xusaska sanadkan ayaa kusoo beegmaya xilli ONLF ay sheegtay inay xoogga saarayso halgan siyaasadeed iyo mid diblomaasiyadeed, iyadoo ururku muddo dheer u ololeynayay in shacabka Soomaalida ee ku nool deegaanka Soomaalida Itoobiya ay helaan xaqa ay u leeyihiin inay go’aansadaan mustaqbalkooda siyaasadeed.
ONLF waxaa la aasaasay sanadkii 1984, waxaana dhidibada u taagay lix xubnood oo hore uga tirsanaa WSLF iyo dhaqdhaqaaqyadii la xiriiray.
Intii ay socdeen munaasabadaha, afhayeenka ONLF, Caddaani Hirmooge, ayaa ka hadlay jihada siyaasadeed ee ururka iyo qorshayaasha uu sheegay in ay horyaallaan.
Waxa uu sheegay in ONLF ay hiigsanayso in sannadka soo socda ay munaasabadda sanad-guuradeeda ku qabato gudaha Deegaanka Soomaalida, gaar ahaan magaalada Jigjiga, haddii xaaladda siyaasadeed iyo amni ay saamaxdo.
Hirmooge ayaa sidoo kale sheegay in ONLF ay doonayso inay door muuqda ka qaadato hoggaaminta siyaasadeed ee Deegaanka Soomaalida, isagoo tilmaamay in ururku hiigsanayo in shacabka deegaanka ay helaan awood ay ku maamulaan arrimahooda siyaasadeed, dhaqaale iyo khayraadka deegaanka.
Afhayeenku wuxuu sidoo kale ka hadlay qorsheyaasha ururka ee dhinaca caalamiga ah, isagoo sheegay in ONLF ay doonayso in qadiyadda shacabka Soomaalida Itoobiya loo gudbiyo hay’adaha caalamiga ah, oo ay ku jirto Qaramada Midoobay, si loo helo taageero caalami ah oo ku saabsan waxa ururku ugu yeero xaqa is-determinayshanka.
ONLF ayaa muddo dheer la dagaallamaysay dowladda Itoobiya, hase yeeshee sannadkii 2018 waxay heshiis nabadeed la saxiixatay dowladda uu hoggaaminayay Ra’iisul Wasaare Abiy Ahmed, iyadoo ururku ka guuray dagaalkii hubeysnaa una wareegay halgan siyaasadeed.
Si kastaba, ONLF ayaa sannadihii dambe muujisay walaac ku saabsan xaaladda siyaasadeed ee Deegaanka Soomaalida iyo sida loo fulinayo qodobbadii heshiiska nabadeed, ayadoo dowladda Itoobiya ay iyaduna sheegtay inay weli muhiim tahay in la ilaaliyo heshiiska nabadda.
From the comments