Dowladda Turkiga ayaa xarun laga diro gantaallada hawada sare ee Xambaara dayax-gacmeedyada ka dhisaysa degmada Warsheekh ee gobolka Shabeellaha Dhexe, taas oo Soomaaliya u abuuri karta fursado dhaqaale iyo horumar farsamo, halka Turkigu uu ka heli karo goob istaraatiiji ah oo uu ku fuliyo barnaamijkiisa hawada sare.
Warbixin uu 26-kii Oktoobar 2026 daabacay wargeyska Politics Today, oo uu qoray Göktuğ Çalışkan, ayaa lagu sheegay in Wasiirka Warshadaha iyo Teknolojiyadda Turkiga, Mehmet Fatih Kacır, uu 9-kii Oktoobar ku dhawaaqay in xarunta Soomaaliya laga dhisayo loogu talagalay dirista gantaallada Turkiga iyo adeegyada dayax-gacmeedyada ee caalamiga ah. Madaxweynaha Turkiga, Recep Tayyip Erdoğan, ayaa sidoo kale xaqiijiyay in dhismaha xaruntu socdo.
Muhiimadda Warsheekh waxay la xiriirtaa goobta ay ku taallo oo u dhow dhulbaraha, taas oo gantaallada qaarkood u sahli karta inay dayax-gacmeedyada hawada sare u diraan iyagoo isticmaalaya tamar yar.
Wasiirka Turkiga ayaa sheegay in daraasadaha la sameeyay ay Soomaaliya u aqoonsadeen goob ku habboon mashruuca, isla markaana dirista gantaallada meel u dhow dhulbaraha ay qiyaastii 30 boqolkiiba ka jaban karto hawlgallada la midka ah ee laga fuliyo Turkiga.
Mashruucan ayaa qayb ka ah barnaamijka qaran ee hawada sare ee Turkiga. Ankara waxay qorshaynaysaa in dhammaadka 2027 ay dayax-gacmeed culeyskiisu yahay 400 oo kiiloogaraam ku dirto wareeg dhulka ka sarreeya 550 kiiloomitir, iyadoo adeegsanaysa gantaalka Şimşek-1.
Haddii xaruntu si buuxda u shaqayso, Soomaaliya waxay ka heli kartaa dakhli, shaqo abuur iyo fursado ay injineerrada Soomaaliyeed ku bartaan xirfadaha la xiriira hawada sare. Waxa kale oo ay dalalka Afrika siin kartaa goob kale oo ay adeegyada dirista dayax-gacmeedyada ka heli karaan, halkii ay ugu tiirsanaan lahaayeen xarumaha ku yaalla dalalka kale.
Si kastaba ha ahaatee, waxaa weli jira su’aalo ku saabsan shuruudaha heshiiska labada dal, gaar ahaan muddada isticmaalka dhulka, sida loo qaybsanayo dakhliga iyo cidda qaadaysa mas’uuliyadda haddii ay dhacaan shilal ama waxyeellooyin.
From the comments