Labaatan dal iyo Midowga Yurub ayaa ku baaqay in la sameeyo iskaashi caalami ah oo lagu xakameynayo khataraha ka dhalan kara horumarka degdegga ah ee sirdoonka macmalka ah (AI), iyadoo la soo jeediyay in la dhiso hay’ad caalami ah oo dejisa isla markaana kormeerta heerarka badbaadada AI.
Baaqan ayaa lagu soo bandhigay bayaan wadajir ah oo ay dowladuhu soo saareen xilli madaxda caalamku ay isu diyaarinayaan kulamada Golaha Guud ee Qaramada Midoobay, kaas oo ka socda magaalada New York.
Dalalka saxiixay waxaa ka mid ah Jarmalka, Koonfur Afrika, Canada, Australia, Imaaraadka Carabta, Singapore iyo Kenya, halka Midowga Yurub uu sidoo kale qayb ka yahay.
Bayaanka ayaa ku adkeysanaya in horumarinta AI ay waafaqdo sharciga caalamiga ah, isla markaana tiknoolajiyaddu ay ku sii jirto hagidda, kormeerka iyo xakamaynta aadanaha.
Dalalkan ayaa soo jeediyay in la sameeyo heerar caalami ah oo mideysan, in la is-weydaarsado xogta ku saabsan shilalka iyo dhacdooyinka halista ah ee la xiriira AI, iyo in la baaro suurtagalnimada dhismaha hay’ad caalami ah oo awood u leh dejinta heerarka, xaqiijinta u hoggaansanaanta iyo isku keenista dowladaha marka awoodaha AI ay gaaraan heerar cusub oo khatar keeni kara.
Madaxweynaha Kenya William Ruto, Ra’iisul Wasaaraha Jarmalka Friedrich Merz, Madaxweynaha Kazakhstan Kassym-Jomart Tokayev, iyo madax kale ayaa ka mid ah saxiixayaasha bayaanka.
Si kastaba ha ahaatee, Maraykanka iyo Shiinaha, oo ah labada dal ee hormuudka ka ah tartanka horumarinta AI-da casriga ah, kuma jiraan saxiixayaasha bayaanka. Sidoo kale India, Kuuriyada Koonfureed, Japan, Boqortooyada Midowday iyo Faransiiska ayaan ku jirin liiska dalalka saxiixay.
Bayaanka ayaa imanaya iyadoo dood xooggan ay ka taagan tahay badbaadada AI, kaddib markii madax ka tirsan shirkadaha waaweyn ee tiknoolajiyadda ay ku baaqeen in la taxaddaro ama la yareeyo xawaaraha horumarinta AI-da si loo yareeyo khataraha iman kara.
Dhinaca kale, shirkadda OpenAI ayaa sheegtay in Maraykanku uu hoggaamin karo dadaallada caalamiga ah ee lagu dejinayo heerarka farsamo ee AI-da horumarsan.
Shirkaddu waxay ku doodday in hoggaaminta hadda ay saameyn ku yeelan karto sida mustaqbalka loo dhisayo nidaamka caalamiga ah ee lagu maamulayo AI.
Arrintan ayaa muujinaysa in dadaallada lagu doonayo in AI loo sameeyo xeer iyo kormeer caalami ah ay sii xoogeysanayaan, inkastoo weli ay jiraan kala aragti duwanaansho ku saabsan cidda dejinaysa xeerarka iyo heerka ay dowladuhu ku lug yeelanayaan.
From the comments